حبيبتي المستبدة حبيبتي المستبدة الحلقة الاولى قامت الصباح شايخة تغني وعاملة جووو حضرت روحها باست عيشوشة وجات خارجة -امل عيش بنتي ماتنساش تقول لابراهيم على دبوزة القاز وفات -باهي عيشوش تو نقولو توصيش حاجة اخرى -لا عيش بنتي رد بالك على روحك رجعت باستها وعنقتها بقوة -نحبك يا عيشوشة الله لا ينحيك عليا خرجت تجري طول لدار ابراهيم دقت الباب حلت عليها سناء -وينو خوك -يا فتاح يا رزاق هالصباح -سناء اليوم عاملة جو و مانحبش نتعارك معاك دزتها ودخلت ديراكت لبيتو لقاتو راقد ملوح على الفرش وحاط مخدة على راسو طبست تدحنس عليه بعدت المخدة وباستو من رقبتو من ريحتها عرفها ماغير ماحل عينيه كلمها -امل شمجيبك على الصباح ......بابا شافك وانت هادة عليا -لا....عرضني في الحومة هز راسو دايخ بالسيف ماخزرلها -صباح النور .....ورجعت تدحنس عليه هبطت شعرها على وجهو تقلق فيه -هات شعندك .....شتحب امل -توحشتك ......قلت نطل عليك قبل مانمشي نقرا -وانا قتلك الف مرة ماعادش تجيني للدار علاش الفضايح قدام بابا -وعم الطاهر يضهرلي يعرف الي انا نحبك والي انا خطيبتك والي... -والي فما اصول .... كي يشوفك عندي اش باش يقول واحنا وحدنا في البيت .... تعرفني نقدرو علاش تسلخلي في وجهي قدامو -تي ماو قتلك ماهوش في الدار علاش تخرنن عاودت طبست عليه وباستو من خدو ذبلتلو عينيها كيف كل مرة -عرس خوك قرب وانا لتوا لا حضرت روحي -يعني؟؟ .... -نحب نكري روبة ماعادش وقت -باهي ..... -وماعنديش مصروف -باهي .....تحبش حاجة اخرى للا امل -و .....نحبك انت -هذا نعرفو جيب الجديد -ونموت عليك ...... -.....ممم -وروحي فيك ....... قعد يخزرلها في وجها كيفاش تحكي يتبع في شفايفها كيفاش يتحركو شدلها خصلة من شعرها يلعب بيها كانت قريبتلو على الاخر وجها في وجهو جبدها طاحت عليه وشوشلها في وذنها -حرام عليك جايتني على الصباح باش تمرضني شنعمل فيك انا توا حستو بكلو مكبوس وصوتو ضايع باش ياكلها ماكلة بعينيه تربثت ودخلت بعضها كل ماتجي تلعب معاه تحصل وجها حمار وحبت تقوم من فوقو كبس عليها وماخلاهاش -ابراهيم ...... -ششششش خليك عندي قعدت لابدة تلعب في عينيها عارفة الي ماعندو مايعمللها يحب يبوسها ومش منجم كيف كل مرة تهبلو تخرجو من عقلو ويقعد مكتف تعذبو وتسيبو ..... قعدو يخزرو لبعضهم بكل حب ورغبة لاهو ينجم يمسها ولا هيا عندها الجرأة تقربلو اكثر تضهر قوية ورقعة ووقت الجد تتكبس وتحشم ... تحل عليهم الباب دخلت سناء عليهم كالبريقاد فجعتهم بعدت امل وابراهيم قام منرفز على اختو -شبي سماك انت مش باش تبطل تفوريخك فما باب يا هوكش تضربو قبل ماتدخل -علاش للا امل تشاورك ديما قبل ماتدخل؟؟ طفتها امل وقامت -ابراهيم نقرا 10 معادش بكري عليا خليني نمشي خير مانحبش نوجعلك راسك ع الصباح بالعرك معاها جبد فلوس واعطاهوملها خذاتهم وباستو بالعاني تغزل في سناء تعارضت هيا وامو في الباب صبحت عليها امل مارجعتش عليها هيا خارجة وتسمع فيها تعارك في ابراهيم -جات تنسل فيك كالعادة ....ماصح رقعتها والله ماتحشمها ابراهيم فد نفس الموال كل مرة يسمعو معادش يحب يجاوبهم خليهم يسبو في امل ودخل يدوش. ..... الحلقة الثانية مشات امل تقرا وفي داخلها غصة تتضاهر بالقوة قدامهم وهيا اضعف منها مافماش كل مرة تتسب وتتهان منهم تعرف الي هوما مايحبوهاش ومش قابلينها من اصلو غير ابراهيم يحبها وفارضها عليهم بالسيف ...كانت تصبر في روحها تقول على خاترو نتحملهم المفيد هو يحبني وراجل معايا ..... كملت القراية وتعدات هيا وصاحبتها ريم كرات روبة حلوة ومستورة روحت للدار لقات عيشوشة تستنى فيها -شبيك ماقولتش لابراهيم يجي يبدلي الدبوزة خليطنا بلاش فطور ماطيبت شي -والله نسيت تو نكلمو توا يجيبها ربع ساعة وكان عندها لابسة سيرفاتمون ولامة شعرها كعكة عرضتلو في الباب باستو من خدو على غفلة سرقت بوسة ودخلت تجري لاهي يحكي مع عيشة وهيا شاردة فيه قربتلو و عنقتو بقوة -تعرف ابراهيم انت وعيشوشة احلى حاجة في حياتي .... نحبك برشا ....مانتصورش حياتي من غيرك .... دورها ليه وعنقها باسها من جبينها وتبسملها -وانت صغرونتي ....قطعة مني ....نحبك ومستحيل نستغنى عليك -ماصاب داركم جاو يحبوني كيف ما تحبني انت -شعليك فيهم انت متاعي بالسياسة بالقوة مرتي وحد مايبعدك عليا ...انجحلي الباك المحنون وبعد ربي يعمل دليل -ان شاء الله .....ابراهيم عيشة غدوا عندها موعد في السبيطار -باهي ......ماو كالعادة تو نهزكم جاء خارج عيطتلو -ابراهيم ..... تلفتلها -ربي يخليك ليا .....الله لا ينحيك عليا غمزها .....تبسم ومشى ابراهيم وامل يحبو بعضهم عندهم سنين حومة كاملة تعرف حكايتهم خطبها من بوها بالكلمة عامين لتالي قبل مايموت وتوا هيا تقرا باك يستنى فيها وقتاش تنجح باش يخطبها رسمي ويعرس بيها في اقرب وقت امل كانت لابراهيم الوريد الي يتنفس بيه يحبها ملي هيا فرخة ربيها على يدو يعامل فيها كي بنتو مستحفظ عليها وحاطها في عينيه بالنسبة ليه امانة خلاهالو بوها ووصاه عليها ..عوضلها بوها كانلها الخو والسند الي تتكا عليه عمرو ماقصر معاها ولا قاللها على حاجة لا طلباتها الكل اوامر ابراهيم مش يحبها بركا يحن عليها خاترها يتيمة امها ماتت وهيا تولد فيها ربيها بوها وماماتها عيشة وعامين لتالي كمل مات بوها بالمرض الخايب عاشت طفولة خايبة تحرمت من امها على بكري تربت محرومة وفي الفقر حياتها الكل تحس بالنقص وماهيش كي اندادها ولاتلها عقدة وكونتلها شخصية متمردة لسانها طويل وماترشفها لحد ناقمة على وضعها وعلى الفقر الي عايشة فيه زادت حياتها تعقدت ونفسيتها تعبت بعد موت بوها الي خلا طبيعتها مزاجية اكثر ابراهيم الوحيد الي كان متفهمها وحاسس بيها ...هو الوحيد الي يوسع بالو معاها بعد عيشة ....احتواها وحاول يعوضلها الي تحرمت منو ....وقف معاها وسايسها متحمل عصبيتها الزايدة قباحتها مرات فيه وفي دارهم شخصيتها استفزازية ماتسكتش وماتخافش تدلل عليه والي تطلبو منو يعملهولها ...غير ترضى بركا وتكون فرحانة .... يعرف ومتاكد الي هيا تحبو على هذاكا متحمل هبالها خاتر يعرف الصراع الي في داخلها يعرف الي هيا تتضاهر بالقوة والي غشها وكركتارها الخايب وراه طفلة بريئة وحنينة رغم ضروفو الي على قدها ماهوش حارمها من شي عامل المستحيل باش يفرحها ومايخليها ناقصة شي ابراهيم يخدم ميكانسيان في الحومة ويعاون في دارهم يحب يعرس بامل ويرتاح ومش خالط . ..يحبها تكون ليه وعلى ذمتو يحبها تولي حلالو قدام ربي وعبادو ....يحب يسكت كلامات الناس عليها وماعاد يحكي عليها حد.اولهم دارهم الي ماخذين عليها فكرة خايبة هو الوحيد الي يعرف نوع العلاقة الي بيناتهم 4 سنين معاها ولا نهار ستغلها ولا خدم مخو عليها حتى البوسة حارم روحو منها خاترو يصلي ويخاف ربي....كان عند كلمتو ومانقضش العهد الي عطاه لبوها ....استحفظ عليها على حساب تعبو كان يتعذب وهو معاها بين يديه ومحروم منها على هذاك يحب يعرس تروحلو ويرتاح الحلقة الثالثة من غدوا هزو عيشة للسبيطار عملت كنترول العادة بعد الفيزيت دخل ابراهيم يحكي مع الطبيب -ماتبدل شي على اخر مرة مانكذبش عليك حالتها ماشية وتسوء تعرف كبيرة في العمر وبدنها ضعيف قلبها تاعب لازمها في اقرب وقت تركب الفالف ابراهيم توتر ودخل بعضو -قداش تنجم تتحمل وتعيش حتى ندبرولها حق العملية -مانجمش نعطيك وقت معين مربوط ببدنها ونفسيتها اقل غش ولا صدمة يتعبلها قلبها اكثر خرج هايم مصدوم من كلامو اصطنع تبسيمة بالسيف قدام امل سالتو شقالو الطبيب -اعطاني دواء تو نتعدى توا نشريه ولازمها راحة لا تعب لا غش شاف على وجها فرحة وراحة ماحب يقوللها شي كان خايف عليها من الصدمة يعرف قداش متعلقة بعيشة ماعندها حد غيرها تحبها برشا وكان يقولها الحقيقة الا ماتهبل خاصة توا قريب تعدي الباك وزيد ماعندها ما تعمللها زايد يحير فيها قرر يتصرف وحدو و مايعلمها كان في وقتو قعد سارح يفكر في عملية عيشة هذوم ملاين لازم يتصرف ويعاونها تعدات الايامات تجري وعرس خوه بدا بدا امل حاولت ماتحتكش بدارهم برشا علاقتها بيهم متوترة كل مايتقابلو تلحم بيناتهم خيرت تحضر كالناس ليلة العرس مشات لحجامة الحومة جبدت شعرها ومكيجت سامبل لبست روبة طويلة ومستورة كلمها ابراهيم قالها هاني في دار كان حضرت ايجا باش نخرج الكل مع بعضنا لصالة اول ماوصلت دخلتلو لبيتو لقاتو مازال يلبس الشوميز في يدو ....قربتلو وقفت قدامو وحطيت يدها على صدرو قعد يخزرلها باهت في زينها في العادة يشوفها بلا مكياج ديما ناتيرال ماهيش من النوع الي لاهية بروحها ....اما هو يحبها كيف ماهيا يحبها خاتر سبونتانا وعلى طبيعتها يحب وجها البري وملامحها الطفولية يحبها بعيوبها وبحسناتها يحب كل حاجة فيها ومقتنع بيها حس قلبو باش يخرج وهيا قدامو وقريبتلو تدحنس عليه منجمش يشد روحو اكثر حط يدو في نصها ولزها ليه حضنها عندو قربها لوجهو يتامل فيها -ان شاء الله على قريب امولتي فرحتي حتى انا بيك تبسمتلو حاشمة -زعما يجي اكا النهار -نوعدك حبيبي يجي باسها من خدها وجاء باش يبعد حطت يدها على رقبتو وطبستلو راسو قعدت تخزرلو بدلال باستو من رقبتو بوسات حنان هبلوه حس روحو عرق وبدا يضعف حاول يبعدها لصقت فيه ....مانجمش يقولها لا خليها على راحتها هو زادا متبنن ريحتها ومش هاين عليه يبعدها عليه قعدو يتمعشقو متوحشين بعضهم فاقو على حس الباب كي دق دخلت امو تغزل وترمي في الكلام لامل -ابراهيم وليدي وينك الناس تستنى من بكري ويتهامزو ديما سلخلي وجهي -امي علاش الكلام الماسط هاني كملت وهاني خارج امل سبقتهم البرا باش ماتلحمش مع حماتها كمل ابراهيم برفن وجاء خارج وقفتو امو في الباب تمسحلو في روج امل من رقبتو -يرزيني فيها هالهاملة مانيش عارفة شعاملتلك اش معجبك فيها يا وليدي من قلة البنات -نحبها يا خديجة .....ن ح ب ه اااا وقتاش باش تفهم وترضى بيها على قريب باش تولي كنتك وانت لتوا لا حبيت تقبلها -الله لا يوريها هاكا النهار والله لا نفرحها بيك - امي هاي نخرجو ماعادش بكري زايد الحديث معاك..... تعدات سهرية تحفونة امل فتقت مواهبها بالشطيح ابراهيم خليها على راحتها شافها فرحانة ماحبش ينكدها مع انو مش حاب رجال يخزرولها في المرواح حماتها زرقتلها في الكرهبة كيما حبت طفاتها ومارجعتش عليها على خاتر ابراهيم وكي وصلو للدار تعاركت هيا وسناء من كلمة لكلمة ستفزتها وامل ضربتها بكف وخرجت تجري خلط عليها ابراهيم باش يوصلها للدار ثنية كاملة تغزل ساكتة ماحبتش تتكلم قعد ماشي معاها وساكت ماحب يجبدلها شي وصلها قدام الدار حلت الباب ورجعتلو ديراكت ترمات في حضنو تبكي -هاك اعطيتها كف مابردتش ضحكلها وقاتلو براسها لا قرصها من خشمها -تعبتوني .. .من توا هكا ملا بعد العرس كيفاش وانتوما باش تعيشو فرد دار مع بعضكم جبدت روحها منو مصدومة -علاش ناوي تسكني معاهم ....اكيد تفدلك -حبيبي كنت عامل حساب باش نكريو وحدنا صدقني مانيش خالط .....نسكنو في دارنا مؤقت حتى ربي يفرجها -اكيد هبلت .....تحبني نسكن معاهم فرد دار تحب القيامة تقيم -امل والله ماعندي حل اخر -اما انت وعدتني ......تفاهمنا باش نكريو دار شنية الي تبدل -الفلوس الي كنت مجملهم عاونت بيهم بلال خويا في عرسو كانت تعقل هبلت عليه قامت تصيح وتعيط وهو يهدي فيها -ابراهيم برا روح .....انسى امل وانسى العرس من اصلو دخلت تجري وسكرت الباب في وجهو الحلقة الرابعة تعداو ايامات وامل مازالت متغششة تلهات تريفز وماراتوش وهو ماحبش يعاود يكلمها في شي تعدي في الباك وماحبش يزيد يمهمشها قرر بعد ماتكمل يجبدلها موضوع عيشة تفاهم صايا مع الطبيب على العملية وديجا خذالها موعد طلعت النتيجة ونجحت كان عارف الي هيا باش تنجح فرحتها نهاترتها ماتتوصفش في الليل جاها للدار باش يخرجها يحتفلو بنجاحها تعشاو البرا وهيا مازلت هازة خشمها عليه بعد هزها للبحر اكثر بلاصة تحبها وتهديها تمشاو شوية وبعد شدها من يدها قعد وحطها في حضنو قعدت لابدة قدامو بين ساقيه وهو محوطها بيديه يخزرلو للبحر ساكتين يلعبلها بشعرها وهيا تستحلى في لمستو كانت متوحشتو على الاخر اما ماتحبش تبينلو جبد سلسلة فينو من جيبو ولبسهالها -كادو ااباك ......ورد بالك تنحيها من رقبتك .....نحبك يا معذبتني ديراكت نقزت عليه تبوس فيه وتعاود وهو يضحك شايخ عليها -وانا نحبك يا احن راجل في الدنيا ..... -نفهم من كلامك الي انت موافقة باش تسكن معايا في دارنا وجها تقلب تنفضت وفامت من عندو -بطبيعة لا يا تسكني وحدي يا مافماش عرس دورها ليه وشدلها يدها -امل كان تحبني بالحق تو توافق تضحي معايا وتصبر -نحبك اما مانحبش داركم ..... -امل لازمك تضحي معايا كيما انا مضحي على خاترك الي نعمل فيه الكل لمصلحتنا ...... -وانا مانيش مستعدة نتذل على خاترك ماهيش مشكلتي عاونت خوك في عرسو كان تحب نسكنو مع عيشة سينو بلاش منو العرس كلامها نرفزو وقام يعيط -عندك حق فاش قام نضحي على وحدة انانية ماتعرفش تحب اعطيها مصلحتها واكاهو والله الي نعمل فيه ماو على خاترك زايد ماتستاهلش .....على خاتر عيشة .....قص على الكلام سمعت كلمة عيشة ترعبت مشاتلو تجري تسال فيه -شبيها عيشة شدخلها -عيشة لازمها تعمل عملية قلبها بيل صايا حكيت مع طبيبها وقرر يعملهالها الجمعة الجاية -وانا وين في هذا الكل علاش ماقتليش شبيني مافي باليش -ماحبيتش نشغشبك على قرايتك وحتى كان قتلك ماعندك ماتعمللها توا هاك علمت كل شي حاضر نهار الاثنين لازمها ترقد باش يحضروها للعملية نهار الاربعاء <br> طرشقت بالبكاء جاتها كالصدمة ماتوقعتهاش -هاكا بسهولة تجيني قبل بنهارين وتقولي الي عيشة باش تعمل عملية على القلب .....وكان تموت ......وكان تموت ابراهيم جاوبني ....انا شنعمل ..... عنقها حشات راسها في صدرو وهبلت بالبكاء حب يصبرها ويطمنها -ملا انا علاش عامل هذا الكل ماو على خاترك فلوس الي كنت مخبيهم جبدتهم لعيشوشة غير ربي يطول في عمرها ويقعد حسها في الدنيا -يعني مااعطيتهومش لخوك -لا يا مهبولة خويا مش اغلى منك ومن عيشة كبشت فيه اكثر وشدها كريز بكاء -يا روحي يا ابراهيم اتخيل لو ماجيتش موجود في حياتي شكنت نجم نعمل من غيرك -قول شكون باش يتحملك غيري تمنات لحضتها روحها تعطيهالو احساس قوي سيطر عليها ماعرفتش كيفاش تشكرو وتعبر عن حبها ليه ماغير مافكرت اول مرة تتجرا وتعملها باستو هيا.....اول بوسة كانت بيناتهم باستو بالي تعرف بالاحساس الي حستو لحضتها غرق معاها نسى وعدو لبوها تمنى وقتها يملكها مش يبوسها بركا المخلوقة الي قدامو مستعد يفديها بعمرو المهم يشوفها فرحانة بوسة وحدة عوضو فيها سنين حرمانهم من بعضهم لهفتهم ورغبتهم كانت اقوى منهم باسها بعنف و بكل حب ..... هبل وهبلها قطع عليها النفس هيا تبعد وهو يرجعها تعاود تبادلو باحساس ما اقوى حتى كي برد وكمل ما بعدهاش عليه قعد حاضنها يتنفس بقوة يحس في قلبو باش يخرج وهيا كانت اتعس منو بوسة رهوجتها ودخلتها بعضها وجها حمار وشدتها رعشة يخزرلها ومش مصدق حبيبتو الصغرونة باستو قاعدة تتعلم في الحب معاه فرح بالفازة الي عملتها سنين وهو يتخيل فيها اللحضة تمنى الوقت ياقف وشفايفو ماتفارقش شفايفها كليها ماكلة وماشبعش منها ....وشوشلها في وذنها تكلم بصوت متقطع يهدي في روحو -مهبولة بعد بوستك هذي مستعد نهد الدنيا على خاترك .....نحبك امل ومستحيل نسلم فيك .....نحبك تاثق فيا عاوني بالصبر .....خليك معايا وانا مستعد معاك لكل شي ... روحت امل حزينة على عيشة خايفة عليها قول مرعوبة من العملية عيشة في بالها بمرضها من قبل خلات ابراهيم يوعدها مايجبدو شي لامل كان بعد ما تنجح الباك جاء وقت العملية واكيد تعرفو حالة امل كيفاش حاسة روحها قاعدة تخرج منها خايفة لا تخسر عيشة تخسر الحضن الوحيد الي بعد ابراهيم .....الموت ولالها كابوس الي حبتهم الكل ماتو وخلاوها ماقعدلها حد كان عيشة من ريحة عايلتها ابراهيم عمل الي عليه وقف مع امل صحة وفلوس هو زادا يحب عيشة برشا ملي هو صغير تعملت العملية وخرجت عيشة لباس امل فرحتها مااعطاتها لحد احلى نهار كان في حياتها تعداو شهرين على الحكاية وخرج توجيه امل باش تقرا في بلاد اخرى بعيدة على ابراهيم كي سمع تجن واكيد رفض صغرونتو تبعد عليه وكانت هذي اول عركة بيناتهم .....واول مرة يقول فيها ابراهيم لامل لا .... الحلقة الخامسة كبرت المشكلة بيناتهم وكل واحد فيهم شد صحيح امل تحب تكمل قرايتها وهو خايف عليها مش قابل فكرة تبعد عليه مايتهناش عليها وهيا مش قدام عينيه حب يقنعها بالسياسة مافهمتش تغششت وشدت صحيح في موقفها حار معاها مالقا حتى حل باش يقنعها .....نفسيتها تعبت تحب تكمل قرايتها وماتحبش تخسرو حتى عيشة كي راتها حزينة وتبكي اعطاتها فردة ذهب مخبيتها لنهار هذا قالتلها بيعها وحضر روحك بيها للقراية رغم فرحتها الا انو قلبها حزين تحب ابراهيم يرضى عليها ويخليها تحقق حلمها ....ايامات ماشافتوش .....ماكلمهاش تو حشتو على الاخر حتى الماكلة قطعتها قعدت بين نارين حايرة حتى نهار عيشة قررت تحكي مع ابراهيم وتقترح عليه حل يرضيهم الزوز هيا في بيتها وتسمع في حسو في الدار خرجت تجري لقاتو قاعد مع عيشة جات عينها في عينو ديراكت هبطتها عيطلها مشات قعدت معاهم -تعرف الي عمري مارفضتلك حاجة ......تعرف الي دموعك عزاز عليا ....تعرف الي انا لا نجم نرقد ولا نخدم ولا ناكل الا ماتكون انت فرحانة وماخاصك شي .....عمري لا قتلك على حاجة لا المرة هذي قرار صعيب حاجة فوق طاقتي كيفاش تحبني نعيش متهني وانت بعيدة عليا ..... -والحل ابراهيم .... -نكتبو صداقنا .....هكاكا على الاقل قلبي يطمن -........ -شقلت امل ..... -عيشة اش رايك -موافقة وراس بنتي مافما حتى حد في الدنيا يخاف عليك ويحبك قد ابراهيم نحب نتهنى عليك ونرتاح نحب نحيك من رقبتي ونحطك في رقبتو .....قداش باش ندوملك انا -اللطف عليك والله كان تصيرلك حاجة مانهبل -عيش بنتي هنيني عليك وطمن قلبي دخلت عيشة لبيتها وخلاتهم وحدهم ابراهيم قعد ساكت يخزرلها حست قلبها باش يخرح من الفرحة قربتلو وجها طمطومة شدتو من يدو حاشمة -ابراهيم ....باش نولي مرتك تبسم ماغير مايشعر عجبتو الكلمة كبسلها على يدها فوق يدو -باش تولي مرتي ....باش نضمن حد مايفكك مني باش تولي على ذمتي باش حتى راجل مايفكر يقربلك .....باش نجم نهدك على صحت راسك ومايسالني حد هههه الحلقة السادسة كتبو صداقهم على الضيق ابراهيم ماقنع امو كان ماوجهو ولا في قفاه هزها بالسيف عليها مش حابة امل تكون مرت ولدها عملو لمة عائلية جاء العدل لبست امل قفطان وفي السهرية عملو عشاء تعدا جو باهي رغم بعض النبزيات امل طفات عليهم الضوء ماحبتش تنكد فرحتها صححت وهيا ترعش عينها في عينو تخزر لتصحاحتو قدامها ومش مصدقة حاسة بفرحة كبيرة الراجل الي تمناتو طول عمرها ولا حلالها وراجلها بعد السهرية الناس الكل روحت قعدت راسها راسو ماحبش يروح الا مايحكي معاها قعدت بجنبو تسمع فيه -امل الي باش نقولهولك توا نحبك تحطو حلقة في وذنك تحفضو مليح وتمشي بيه انت توا وليت مرتي وعلى ذمتي بيناتنا رابط مقدس نحبك تحترمو وتحافظ عليه اعطيت ثيقتي فيك حبيتك وكنت معاك راجل طول عمري نساير فيك وناخو بخاترك مش ضعف مني اما محبة فيك .....باش نعمل المستحيل ونصبر عليك حتى تكمل قرايتك ونحققلك حلمك في المقابل تصوني وتحافظ على روحك توعدني تكون قد ثيقتي .....رد بالك تغلط في حقي امل راني والله عمري مانسامحك .....عرفتك نضيفة وحبيتك بحسناتك و بعيوبك هبالك الكل نعديه الا تمسني في .... قصت عليه حطت يدها على فمو وقربتلو -اتهنى ابراهيم ....ماغير ماتوصيني انا امل الي ماتشوف حتى حد غيرك .....انت اكثر واحد تعرفني بعد بابا انت الراجل الوحيد في حياتي شدلها راسها بين يديه خزرلها بحب باسها من جبينها وحضنها كبشت فيه -نحبك يا ابراهيم .....والله نموت من غيرك ..... تعدات الايامات ورجعت القراية ابراهيم وصل امل للفوايا وتهنى على امورها الكل ماكانش ساهل عليه يفارقها مستانس كل يوم يشوفها ويملا عينو منها مستحيل يرقد ماغير مايسمع صوتها باش يتوحشها ويتوحش تخرنينها ودلالها عليه ..... لاخر لحضة وهو يوصي فيها على روحها روح وقلبو قعد عندها بدات رحلة جديدة في حياتي امل عالم اخر ....ناس اخرى ....طريق نحو المجهول عملت صحاب وفيسع مادخلت روحها وتاقلمت مع وضعها الجديد بدات تكتشف في الدنيا من ناحية اخرى عالم غريب عليها مش متاعها بدا الشيطان يلعب في لعبتو بدا يزينلها في الدنيا سخرلها بنات الحرام باش تبعهم كان ساهل ياسر انها طيح وحدة كيفها مغمضة ماعندهاش خبرة كانت عيشة في محيط معين تحت جناح ابراهيم معاه مطمنة وماتخاف من شي اعطات ثيقتها فيسع في بالها العباد الكل كيفو باش يحبوها ويخافو عليها 3 شهور وعينيها تحلت بدات تبعد بالشوية على طريق الي حددهولها ابراهيم حياتها تقلبت الدنيا غرتها وخلاتها تنسى وعدها ليه ابراهيم كان وراها ملي بدات تقرا كل يوم يكلمها ويطمن عليها كل اخر جمعة يمشيلها يخرجها ويعدي معاها نهار كامل يعطيها مصروفها ويروح .... وراء تغيير تصرفات امل زوز بنات في الفاك نسرين ومنال هوما الي قلبولها حياتها 180 درجة الحلقة السابعة نسرين بنت راجل اعمال امها وبوها مطلقين بوها عندو شركة اعلانات ومنال كيفها بوها مقاول كبير كارين دار مع بعضهم وعايشين حياتهم بالطول والعرض امل رتاحتلهم وولات ديما معاهم مايتفارقو كان وقت النوم امل ترجع للفواي وهوما للدار نهار هوما في الفاك وبو نسرين جاء باش يروح بيها طلعو معاه باش يوصلو امل في ثنيتهم والنهار هذاكا كان نقطة تحول في حياتها مجيد بو نسرين تضرب في امل وبما انو زاني وزير نساء حطها في مخو ولا ديما يجيهم للفاك باش يروح بيهم بدا يتقرب منها بالشوي كوم كوا في مقام بنتو بدا يغري فيها بالكادوات هيا و نسرين ومنال ولا لاهي بيها ديما يكلمها ويسال عليها كان يخططلها مليح باش يوصللها تصرفاتو الكل كانت تدل على انو محترم ويعامل فيها كي نسرين بنتو تعدات الايامات وامل قاعدة تغرق ماغير ماتحس زادت تعلقت اكثر بيهم حست روحها معاهم عايشة ولات تلبس وتمكيج ولات لاهيا بروحها خرجوها من قشرتها ....تعلمت تكذب على ابراهيم سلمت في قرايتها وولات تخرج معاهم بالسرقة ابراهيم قاريها مربيها على يدو يحس بيها حتى قبل ماتتكلم تصرفاتها ماعادش عاجبتو ولا عابدها بالتليفون كثرت اسئلتو حست بالخنقة والضغط منو ولات على اعصابها كل وين يكلمها تفد ويتعاركو ابراهيم حاول يتفهمها ستوعبها كالعادة ووسع بالو معاها اول فرصة مشالها حب يحسسها بحبو يقرب منها كان متاكد الي البعد هو السبب في تغيير تصرفاتها ....عدا نهار كامل معاها حب يعوضها ويفرحها تقابلو نهارتها بالصدفة مع نسرين ومنال سلمو وتعرفو عليه ابراهيم مارتحلهومش من اول ماشافهم اما ماقال شي لامل ماحبش يدخل في اختيارها لاصحابها ماحبش يعمل معاها عركة ويروح ويخليها متغششة بعد نهارين هيا في الفاك وابراهيم كلمها قالها اخرج هاني البرا ستغربت مازال كي جاها نهار الاحد خرجتلو مفجوعة من وجهو عرفت الي فما حاجة جيتو على غفلة ماهيش عادية حطت الاحتمالات الكل الا موت عيشة الحلقة الثامنة صدمتها كانت كبيرة لاخر لحضة مش مصدقة ابراهيم في لول كذب عليها قالها تاعبة وتحب تشوفك ماحبش يفجعها ديراكت لمت دبشها فيسع وطارت معاه في الثنية كي قريب يوصلو قاللها هبلت في الكرهبة تبكي وتضرب في روحها كيفاش ماتت وماشافتهاش حتى ابراهيم مانجمش يهديها دوب ماوصلت تشوف في كراسي البرا ورجال واقفة دخلت طول كالمهبولة تلوج على عيشة وابراهيم وراها خايف عليها اول ماشفتها مكفنة ومسبولة ترمات عليها تبوس فيها وتعنق هيا تجبدها والنساء يبعدوها خرجت من عقلها في فمها كان تكذبو عيشة حية وهاي باش تقوم .....عيشة ماماتتش ...ماتموتش وتخليني ....تدز في النساء تبعد فيهم تحب تفيقها مرة تضربهم مرة تضرب روحها صوتها بح من الصياح والبكاء دموعها نشفت وجهدها طاح ماعاد حاسة بشي الدنيا ضلامت في عينيها بدنها ترخف بين يدين ابراهيم وداخت..... نهارين لا ماكلة لا نوم تبكي تتعب ترقد باش تنسى تعاود تفيق تتفكرها نارها تشعل ابراهيم حار معاها عارف خسارتها كبيرة وماكانتش متوقعتها حب يواسيها ويخفف عليها مانفع معاها شي تدور بدن بلا روح معاه ومش تسمع فيه مافارقهاش لحضة حتى امو تنازلت وقعدت معاها ايامات غاضتها ماقعدلها حد الدار فرغت عليها حتى خالها رجع للبلاد والجيران كعبات ماشين جاين عليها جمعتين تعداو على موت عيشة وامل ماخرجتش من حزنها سكوتها كان مخوفو عارف الي بعدو عاصفة يعرفها مجنونة وردة فعلها خايبة ماتعرفش تعبر على الحاجات الي توجعها مندفعة ....متهورة وماتفكرش قبل ما تتصرف ....خاف عليها من روحها لا تزيد نفسيتها تتعب وتتازم كيما صارلها في موت بوها قطعت الماكلة والقراية قعدت شهرين منزوية لا تحكي مع حد ولا تخرج من الدار وبعد طبيعتها تبدلت ولات عنيفة وقبيحة ماعاد تحترم حد ترجمت حزنها وضعفها للقسوة نقمة على الدنيا الي حرمتها من امها وبوها ماعادش حاسة بالامان ولات تصطنع في القوة باش ماتخلي حد يهينها ولا يتعدا عليها بالطريقة هذي في بالها تحمي في روحها من الدنيا نهار روحت من الجبانة حزينة دموعها على خدها ابراهيم كي شافها قلبو وجعو عليها نهارتها طرشقت و فرغت قلبها -ابراهيم عيشة مشات صايا وماعادش ترجع .....تصدق الي انا خليتها تحت التراب وروحت وحدي ....شكون قعدلي بعدها .....شكون باش يحن عليا غيرها .....كيفاش باش نجم نعيش وهيا مش معايا .... -امل يا روحي وانا وين مشيت .....مادامني انا حي ماتخاف من شي ....امل راني ابراهيم كيفاش تفكر هكا وانا موجود ....انت مش مرتي بركا انت بنتي وحياتي الي عايشها انت الوريد الي ينبض ....انت الي مهبلتني ومتعبتني .... تبسملها ومسحلها على راسها قربتلو وقعدت عندو حضنها بقوة -صغرونتي ....نحبك .....انا بوك وانا خوك وانا الام الي ماجابتكش مدامني معاك وتحت جناحي ماتستحق لحد نعوضلك عيشوشة الله يرحمها نوعدك مادامك معايا ماتعيش كان فرحانة .... حشات راسها في رقبتو تشم في ريحتو كبشت في مريولو كان تلقى تحل صدرو و تدخل عندو ابراهيم بالنسبة ليها طوق نجاة ياما وقف معاها في اصعب اوقات حياتها بلا بيه تضيع اول راجل في حياتها حلت فيه عينها ماتتخيلش روحها مع راجل غيرو هو الوحيد الي يفهمها ويستوعبها هو الوحيد الي يتحملها ....هو الوحيد الي يحبها بعيوبها هزت راسها تخزرلو عينيها معبية بالدموع -ابراهيم ....رد بالك تخليني ....راني نضيع من غيرك .....ماعندي حد توا كان انت ....رد بالك يجي نهار وتتخلى عليا ....نموت -شششششش ماعادش نحب نسمعو الكلام هذا انت ماغير شي بطبيعتك تجري في دمي كيفاش تحبني نسلم فيك وانا معاهد بوك عليك وكملت عيشة لاخر لحضة توصي فيا عليك ....بالسيف عليا وليت حبل في رقبتي لين نموت -كيفاش ماتت .....خليتها لباس ماي نجحت العملية ..... -امل قلبها مرهون ببيلة في اي لحضة تاقف عمرها وفى حسيتها تاعبة ايامات لتالي قولتلها نهزك لطبيب قاتلي لا -يعني هيا كانت مريضة وماقتليش ....علاش ماكلمتنيش قامت تبكي و تصيح تحولت فجاة رجعت امل الي يعرفها -علاش حرمتني من شوفتها ....في بالك بيها ابراهيم تاعبة و ماقتليش ....علاش شعمتلك -ماحبيتش نقلقك قولت تعب كيف كل مرة حالتها ماكانتش كيما تتخيل .... -والله لا نسامحك خليتها حتى ماتت وانت تعرف الي هيا مريضة مانجمتش تهزها لطبيب بالسيف ......مانجمتش تكلمني تقولي .... -امل فاش قام هالكلام تعرف معزتها عيشة لو جاء بيدي مانقصرش معاها ربي حبها عمرها وفى شتحبني نعمل -جرتك انت ماتت لو هزيتها للسبيطار رام عرفو شبيها ....انت السبب ابراهيم عمري لا نسامحك حرمتني منها من وقتها وهيا تلوم فيه عارفة الي هو حكم ربي اما باش تخفف على روحها باش تنجم تقبل موتهاحاطت اللوم عليه نسرين ومنال ملي ماتت عيشة وهوما واقفين معاها يكلموها ديما وجاوها برشا مرات يطلو عليها ونسوها وخففو عليها بعد شهر قنعوها باش ترجع تقرا فكرت مليح وقررت تسمع كلامهم فماش ماتلاهي روحها وتنسى ..... وبرجعوها صارت نقطة تحول اخرى في حياتها لحلقة التاسعة رجعت مندفعة تحب تنسى موت عيشة باي طريقة ولات تخرج تسهر مع نسرين ومنال تملا في غيابها بووجودهم معاها زادت تعلقت بيهم اكثر لقاتهم ملاذها باش تخرج من حزنها .....كل ليلة سهرية ....سلمت في قرايتها ولات تبات وتصبح معاهم في الدار الي كارينها ولات تعري تلبس كيفهم نسات الي هيا على ذمة راجل فقدت الكنترول على روحها .....ولات تكذب على ابراهيم بالشوي بالشوي بدات تبعد عليه .....نسرين ومنال كانولها منكر ونكير يزنو على راسها في مازلت صغيرة في ربط روحك مع راجل منتف في انتي متثقفة عليه مش متاعك باش تاخو ميكانسيان في ياسر خانقك ومعقد ....عيش حياتك وابني مستقبلك وحدك ماتخلي حد يدفنلك شبابك انت ماكش محتاجة لراجل تنجم تعمل على روحك وحدك الخ....... سكنولها في مخها بعد العز والعيشة الي شافتهم معاهم نسات ابراهيم والي عملو على خاترها الشيطان عميها زينلها الدنيا طمعت حبت تعيش حياتهم ماغير مايخنقها ابراهيم ولا يتحكم فيها .....رجعت مشاكلهم ما اقوى امل تبدلت برشا ولات ترجع عليه ومرات تعلق عليه التليفون قاعدة تضيع من بين يديه حس بالخطر عارف الي وراها مصيبة مخبيتها .... بو نسرين اقترح عليها خدمة عندو بما انو عندو شركة اعلانات حبها تكون مودال مع انها ماهيش مزيانة لهاكي الدرجة زينها عادي وطبيعي وممكن هذا الي خلاه يعرض عليها تكون وجه اعلاني جديد بالنسبة ليها كانت فرصة العمر جاتها على طبق من ذهب مشروع باش يغيرلها حياتها تقرا وفرد وقت تخدم تحب تحس بفلوسها بكيانها تحب تعمل على روحها تحب تعيش وتتمتع تحب تعوض حرمانها من بوها وامها ومن عيشة تحب تكون غنية باش تحمي روحها من المستقبل او بالاحرى هذا الي قنعت روحها بيه اول فرصة تقابلو فيها امل جبدت لابراهيم على الخدمة جن جنونو عليها رفض وماقبلش حتى يناقشها حبت تقنعو وفشلت وعنادو خليها تزيد تتمرد عليه وتشد صحيح اكثر وبطبيعة ابراهيم المرة هذي جاء ضدها ومستحيل يتنازل على حاجة كيف هذي تعاركو ومن كلمة كلمة امل فقدت السيطرة على روحها وجعتو بالكلام عيرتو بخدمتو قاتلو الي هو معقد حياتو الكل دافن روحو بين شحم الكراهب والمفاتح مايساعدهاش تكمل حياتها تحت رحمتو تصدم من كلامها مش مصدق الي امل تحكي معاه هكا تحكم في اعصابو بالسيف وجاوبها -شحم الكراهب هو الي دللك ووصلك للي انت فيه .....اليدين هذوم تعبو عليك باش يعيشوك فرحانة وماتحتاج لحد ....شنية الي صارلك امل حتى تقلبت هكا .....لها الدرجة طلعت مادية تخير الفلوس على كلمتي -افهمها كيما تحب ....ابراهيم نحب نعيش نحب نضمن مستقبلي ماعادش عندي ثيقة في الدنيا ....خليني نعاونك ....علاش نكذبو على بعضنا ....انت وحدك مش خالط ....وقتاش باش نعرسو ....من حقنا نعيشو ....نحب نسكن في دار وحدي ......مليت من مدان يدي ليك نعرف ماكش مقصر معايا اما انا نحب نعيش كي اندادي متفرهدة علاش نبقى نستناك حتى تدخلك كرهبة للقراج باش تنجم توفرلي الحاجة الي ناقصتني ....علاش نحرمو في رواحنا من عيشة باهية ....امانك ابراهيم خليني .... ....نحب نعمل على روحي.... تبسم بقهرة بوجيعة ماحاس بيها كان هو -ههههه تحب تعري روحك باش تثبت وجودك .....تحب تدخل لدومان بكلو خمج ....وانت مرتي وعلى ذمتي ....تحب الرجال الكل تتعدا عليك وانا نتفرج .....تحب تخرج عريانة امل .....تحب تبيع روحك للي يسوى والي مايسواش .....هذي اخرتك .....اش صارلك يا بنتي فيق على وضعك ....هذي قراية الفاك ترد هاكا رخيصة ......حاسس روحي معادش نعرفك ....كلامك ...لبستك ....طريقتك معايا شي ماعاد عاجبني فيك .... -هذي العيشة الصحيحة ابراهيم كنت مدفونة وتحب تزيد تدفني في هاكي الحومة تحب تسكني مع داركم باش يذلوني ....قربتلو تستعطف فيه شدتو من يدو تحب تقنعو -ابراهيم امانك ماتحرمنيش من تحقيق ذاتي ......خليني نجرب حضي في الدنيا ...نحب نعمل على روحي من غيرك ....نحبك ابراهيم ونحب نكمل حياتي معاك .... قص عليها بعصب نطرلها يدها وجعها وقف قدامها يهدد فيها -امل صكر فمك خير راك هازتني للجنون فاش قاعدة تحكي ياخي .....ضربها على راسها باش تفيق .....تحب تردني طحان بالسيف .....تحبني نوافقك على هبالك ....تحبني نحطك بيدي في سكة ماترجعش ......امل كلمتين وماعنديش غيرهم يا تفيق على وضعك وترجع امل الي نعرفها يا تنسى واحد اسمو ابراهيم لحلقة العاشرة هبلت نسرين تحبني نسلم في ابراهيم على خاتر الخدمة .....مهبولة ياخي ....ابراهيم راهو الي تحكي عليه -ابراهيم متاعك واحد معقد و جاهل يحب يدفنك بالحياة فرصة كي هذي تجيك مرة في العمر تفلتها بالساهل على خاتر راجل يا بنتي غيرك يتمنى فيها وانت جاتك لحد يدك تقوم ترفضها -انت ماتعرفش ابراهيم المرة هذي مستحيل كان نجم نقنعو نعرفو مليح عندو نخوة تفكيرو تفكير راجل شرقي ويغار مستحيل يخلي مرتو تخدم خدمة كي هذي وماوصل خيرني بينو وبين الخدمة الا ما واثق من قرارو ومستحيل يتراجع فيه -هاو سهلها عليك ....هو الي حب هكا ....علاش تخليه يتحكم في حياتك بيناتكم تخربيشة يهددك فيك بيها اختصر عليه انت الثنية وخلي كل واحد يمشي على روحو -اكيد تفدلك تحبني نطلق ابراهيم .....مستحيل .....ابراهيم روحي ...فماش واحد يستغنى على روحو .....بلا بيه نضيع .....الي بيناتنا حد ماينجم يفهمو ..... -والحل امل .....نقول لpapa رفضت واكاهو بعد جمعتين ...... -قتلك ابراهيم فك عليا من الجيان لداركم شفت شصار -وين انا وين انت بلاصتك بجنبي انت مرتي ومن حقك تحضر لخطبة اختي -وعايلتك ماتحبنيش كان ماخرجتنيش الله اعلم شنية كان باش يصير شديت روحي بالسيف على سناء وزيد امك زرقتلي كيما حبت الى متى باش يقعدو يعاملو فيا هكا -حتى ربي يهديك ويهديهم .....شدلها يدها وباسها -حبيبي شوية صبر امي مراة كبيرة والله ماعندها وين توصل مع الوقت تو تستانس وتقبلك كي تشوفنا متهنين وفرحانين بعد العرس تو تتبدل معاك وبالنسبة ل سناء تو نوقفها عند حدها ونخليها تحترمك بالسيف عليها مع انك مش محتاجة حتى ندافع عليك حقك تاخو فيه ثاني ومثلث قرصها من خشمها -مرتي لفعة ولسانها طويل مانخافش عليك هههه يزي ابراهيم مابلدك ...علاش انا ضالمتهم -نعرف اش خلاني ساكت عليك .....عارف باش تعبوني اما ماعندي حتى حل اخر الي يهمني نعرسو وندخل بيك هههه حشمت وجها حمار وتخيلت روحها معاه الليلة هذيكا تحلم بيها عندها سنين تستنى في اللحضة الي يملكها فيها بالنسبة ليها عذريتها الكادو الوحيد الي تنجم تقدمهولو كتعبير على حبها وامتنان علي عملو معاها الكل خاتر تعرف الي الحاجة هذيكا حلمو هو زادا ويستنى فيه عندو سنين -شقلت للا .....شبيك سكت ودخلت بعضك ....اخزرلي في وجهي .....وقولي وقتاش نعرسو .....ماعادش عندي صبر -مش توا حتى تتحسن ضروفك شوية نحبك تعملي عرس كيما وعدتني نحب نلبسلك الروبة البيضاء نحب نروحلك عروسة ..... باسها من جبينها برغبة وحب -اكيد حبيبي وانا عند وعدي كيفاش تحبني ما نفرحكش بعد ما نحيت من مخك موضوع الخدمة الي طلعتهولي فجاة تربثت ودخلت بعضها بدلت فيسع الموضوع تعدا النهار على خير في دار حماتها و في ليل رجعها للفوايا من غدوا كان عندها موعد مهم كانت خايفة على الاخر حضرت روحها ومشات ساق لقدام وساق لتالي ..... اليوم عندها اول جلسة تصوير..... الحلقة الحادية عشر وصلت للشركة بناية كبيرة مضخمة بكلها بلار دخلت لبيرو سي مجيد فرح بيها على الاخر واخيرا صارت بين يديه سلم عليها وقعد مقابلها -الكونترا وتصحح وتوا باش ندخلو في الصحيح .....اكيد تعرف طبيعة خدمتنا كيفاش نبداو بتبديل اللوك وبعد جلسات تصوير ... للا شكون كيفك وجهك يتصدر لاهم بيوت ازياء في تونس .....بداية موفقة للاحتراف حاسة روحها في حلمة تحب تكملها وفرد وقت خايفة لا تقوم منها تلقى روحها دخلت في كابوس مستحيل تفيق منو عارفة الي تعمل فيه غالط وهازها لهاوية .....كانت متاكدة لو ابراهيم يفيق بيها باش تخسرو على طول مستحيل يسامحها قاعدة تلعب بالنار ومش فايقة كذبت عليه على اساس نحاتها الفكرة من راسها وخترتو هو سمعت كلام نسرين قنعتها تخدم ماغير ماتقولو كانت متاكدة الي هو مش باش يفيق بيها اما الي يحسب وحدو يفضلو وجها تعرض في مجلة كوجه اعلاني لدار ازياء معروفة ماعرفتش كي سمعت الخبر تفرح ولا تحزن تشوف في وجها على غلاف المجلة ومش مصدقة وحدة اخرى في بلاصتها طير بالفرحة بداية مشجعة لكاريارها دخلت بقوة في الدومان خوفها من ابراهيم لغى فرحتها دعات ربي باش مايفيقش وناسية الي حاجة كيف هذي مستحيل تتخبى نهارين من بعد وابراهيم كان عندها وفي يدو المجلة خرجت من الفاك ترعش بعد ماكلمها من صوتو فهمت كل شي دوب ماشافها خارجة عرضلها يغلي بكلو..... العصب يهز فيه وينفض اول مرة تشوفو في الحالة هذيك دوب ماوصللها لوح المجلة على وجها -خسارتك .......خسارتك امل -ابراهيم .....ستنى نفهمك -صكر امل صكر ....ماعندك ماتحكيلي .......مانحبش نسمعك .....تكذب عليا .....دغفتني ......هيا هيا وعملت الي في بالك ......كسرت كلمتي .....طحنتني امل كيما حبيت .... -ابراهيم امانك ..... بدا يعيط والناس تتفرج ماهمو حد شدها من يدها يرج فيها كان لقا راو هرسها راو محاها تحت ساقيه -بعتني امل على وسخ الدنيا نسيت ابراهيم والي عملو على خاترك ....بعت حبي بالرخيص ...... جات باش تحل فمها سكتها .... -خيرتك قبل وانت خترت ......وانا توا نفضت يدي منك ..... ابراهيم انساه.... جملتو الاخرى شلتها خليها واقفة جامدة كان دموعها على خدها .....مشى وخليها تتعاود في وذنها -خيرتك قبل وخترت .....نفضت يدي منك .....ابراهيم انساه ابراهيم انساه وقتها فاقت على روحها وبدات تضرب في روحها بالكف تشوف فيه قدام عينيها مشى وخليها عارفة الي مستحيل يرجع ولا يسامحها .....كانت متاكدة الي هيا خسرتو صايا خسرت ابراهيم .....خسرت راجلها و حب حياتها نهارين وهيا تطلب فيه وهو مايهزش ....قريب تموت عليه تحب تشوفو وتحكي معاه فكرت انها تمشيلو نسرين ومنال ماخلاوهاش قنعوها تخليه على راحتو يراجع روحو تو يتوحشها ويجي وحدو يسامحها ..... تعدات جمعة وهو لا كلمها ولا جاها قريب تهبل عليه صبرت صبرت ومشاتلو كان تحت الكرهبة يبربش في قطعة يشوف في صباط طالون عند راسو هز عينيه شافها رجع تحت الكرهبة عبارة ماهيش موجودة ومشافهاش من اصلو -ابراهيم لازم نحكو .....نحبك تسمعني طفيها تنرفزت وبدات تعيط -ابراهيم نكلم فيك ماتحقرنيش قام يمسح في يدو عطاها بضهرو يستنى فيها باش تتكلم -ابراهيم نعرف الي انا غلط وماكارنيش نكذب عليك ......انت الي لازيتني ماحبيتش تفهمني ..... ماجاوبهاش وقفت قدامو باش تشوف ردة فعلو خزرتو ليها عذبتها تمنات الارض تتشق وتبلعها -ابراهيم امانك شبيك ساكت قول حاجة عيشك -اش عندي باش نقول ......اصلا وجودك في القاراج من مقامك تو حوايجك يتمسخو -ابراهيم تتمقصص .....قربتلو ترعش -ابراهيم امانك افهمني ..... لوح المفتاح من يدو فجعها شدها من يدها وكبس عليها -شنية باش نفهم بالضبط .....رديتني طرطور الماء ماشي تحت سقايا وانا مافي باليش....مرتي تصول وتجول وتمد في وجها في المجلات وانا اخر من يعلم .....سناء تجيبلي المجلة فرحانة بخوها الصيد خلا مرتو عارضة للي يسوى والي مايسواش خليت امي تزيد تحبك اكثر بعد الي عملتو مازالت باش تتشرف بيك ..... -غلط ..... -غلط ؟؟؟ نبهتك ......كنت واضح معاك .....جاية توا تتبهلل ...تعرفني كل شي نعديهولك الا تكسر كلمتي وخاصة حكاية كي هذي ..... تنطرت نقزت عليه عنقتو ماعرفتش شتعمل كانت خايفة ومرعوبة منو مستحيل كان باش يسمعها لقات الحل الوحيد تهديه بيه قعد واقف كالصمبة حل يدو باش مايمسهاش حطت راسها على صدرو تبكي عض على سنيه بغل وجبد روحو منها حط يدو قدام وجها باش تشوفهم مسخين -اليدين هذوم مايتشرفوش حتى يمسوك .....ماتستاهلش التعب الي تعبوه عليك ......امل عفتك ...... حلت عينيها مصدومة فيه اول مرة في حياتها تسمع منو كلمة توجع .....حستها سكينة وغرسها في قلبها قعدت كان الدموع هابطة وراسها يتحرك وحدو تقولو لا .....امانك كل شي الا تكرهني -ابراهيم .... -ابراهيم مات ..... -ابراهيم ......مالقات ماتقول -امل انا وياك ماناش فرد سكة خيرتك وانت خترت ماينفعش نكون الزوز في حياتك تتوسل فيه بعينيها عض على قلبو ومارحمهاش -اعطيتك كل شي امل ماعاد عندي مانعطيك ....فهمت حبي ودلالي ليك ضعف حتى تجاوزتو ......امل ماتستاهلنيش الي بيناتنا وفى الحلقة الثانية عشر ايام وهيا تقنع في روحها الي ابراهيم باش يسامحها اكيد مازال متغشش منها مدة يبرد ويجيها ....وعدها مهما كان عمرو مايتخلى عليها .....ابراهيم يحبها وماينجمش يعيش من غيرها كل يوم الكلام هذا تعاود فيه لروحها الف مرة في نهار لين ايست من رجوعو ......بدات تفيق من صدمتها عرفت الي ابراهيم مستحيل يرجعلها وحدو هيا غلطت وهيا الي لازمها تصلح هيا الي لازمها ترجعو ......تطلب فيه مايهزش بعثتولو ميساج طلبت فيه السماح ماجاوبهاش قريب تهبل خايفة لا تمشيلو وهو مازال منرفز تكون ردة فعلو كالمرة الاخرى تتفكر كيفاش طردها تتفكر كل كلمة قالهالها .....كان واضح معاها خذا قرارو ووفى .....مش مصدقة ابراهيم يعملها بالحق ويطلقها .....اما هيا متاكدة مش يفدلك عمرو ماكان جدي كالمرة هذي....قريب تهبل كل ماتتخيلو ماعادش معاها تحس روحها خارجة منها لازم تتصرف ترجعو قبل مايفوت الفوت .....من القهرة والوجيعة ماعادش عارفة شتعمل مشات لنسرين باش تلقالها حل حبت تقنعها بالطلاق قالتلها عيش حياتك وشوف مستقبلك وانساه امل هبلت ماعاد همها شي غير ابراهيم -خسرت ابراهيم و انت السبب سمعت كلامك حتى هزيتني للهاوية يا ليتني ماسمعتك ولا تبعتك وانا ماضربتكش على يدك بالسيف انت وحدة انانية تحبو وتحب الفلوس تحب حاجتين مايتقابلوش كنت تنجم تفرض عرض papa وتختارو -هذا الي يلزمو يصير .....لازمني نصلح غلطي ونرجعو ليا ....انا من غير ابراهيم نضيع .....نموت ....... خطفت صاكها وخرجت طول للشركة باش تقابل سي مجيد هدفها الوحيد تفسخ العقد تبطل الخدمة وترجع لراجلها تعمل المستحيل باش يسامحها اول ماحكاتلو عرف الي هو باش يخسرها قبل مايوصل للي يحب عليه حاول يقنعها بالطلاق وكي شافها شادة صحيح ضهر وجهو الحقاني تحرش بيها في بيروه قالها الي هيا تعجبو وهابل عليها ....مستعد يحققلها احلامها يردها غنية ومشهورة غير تقبل بعلاقتها بيه خافت وقامت مفجوعة -سي مجيد راك في مقام بابا .....عيب الي قاعد تقول فيه -العيب انك ترمي روحك على راجل كبير وغني تقبل كادواتو وفلوسو....حسب رايك على سواد عينيك نعمل في هذا الكل معاك -امانك سي مجيد ...ماني طالبة منك شي معادش نحب نخدم باش نخسر راجلي جرت هالغلطة -في بالك ساهل هو تقبل وقت ماتحب وترفض وقت ماتحب للا كونترا بيناتنا ولازمك تحترمو ماتلزنيش نتبعك قانونيا باش تعوضلي الخساير الي باش نتعرضلها جرت اللعب متاعك -سي مجيد عيشك افهمني .....والله مانجم نكمل .....مستعدة نعمل اي شي غير اعفيني من ها الخدمة قربلها قعد على البيرو مقابلها حط يدو على خدها يتحسس فيه -ملا مستعدة تعمل اي شي ...... جاوبتو براسها -وانا ما نحب شي غيرك نطرت الكرسي وقامت ترعش -انت واحد واطي و بلا شرف انا الغالطة الي تبعتك وصدقتك هذي اخرة صحت راسي وثيقتي الي حطيتها في عباد مايستاهلوش بدات تعيط هدت عليه البيرو فضحتو قدام الخدامة -ياخامج يا مسخ نجوم السماء اقربلك مني -باهي للا امل اتذكر الي عملتو .....والله ماننساهولك خرجت تجري دموعها على خدها مش عارفة تفكر ولا شتعمل لقات روحها ماخذة اللواج وطايرة لابراهيم هو الوحيد الي ينجم يخرجها من الورطة الي حطت روحها فيها ثنية كاملة تبكي تتفكر في بهامتها وين وصلتها لها الدرجة عماتها الفلوس وغرتها الدنيا .....يا ليتها سمعت كلام ابراهيم ...يا ليتها فاقت قبل مايفوت الفوت شصارلها حتى تبدلت هكا شنية الي خليها تكسرلو كلمتو وتتخلى عليه حاسة بقهرة وندم مش عارفة كيفاش باش تصلح بهامتها ومنين باش تبدا .....ماشية لابراهيم ومش عارفة شنية يستنى فيها ...... وقفت قدام باب دارهم ترعش بكلها يدها مش منجمة تهزها باش تضرب الباب مرعوبة من ردة فعلو .....ماعندهاش حل اخر هو الوحيد الي ينجم يعاونها الحلقة الثالثة عشر كان راقد قام على حس ضربان قوي على الباب حل مفجوع لقاها قدامو وجها مبلبز بالمكياج وعينيها منفخة قعد مصدوم باهت فيها ديراكت طرشقت بالبكاء وترمات عندو عنقتو تحكي وتبكي مافهم منها شي حضنها بيد ودخلها واليد الاخرى دز بيها الباب سكرو .....خليها عندو حتى هدات بعدها عليه باش يشوفها هبطت راسها مانجمتش تخزرلو -ابراهيم سامحني .....ابراهيم نحبك تعاوني .....مجيد الكلب هددني لو بطلت الخدمة باش يشكي بيا و حب ....حب ....يتعدا عليا .... ماكملتش الكلمة وجاها كف لا يقرا لا يكتب عميها هو بيدو مش عارف كيفاش ضربها نزل على سنيه بغل باش يتحكم في اعصابو و مايعاودش يمدو عليها -بعد شنية جايتني ....بعد ماعملت الي في راسك ....ماك خترت ثنيتك علاش راجعتلي ماخلاتوش يكمل وعاودت ترمات في حضنو كبشت فيه تبكي بالشهقة -ابراهيم نحبك تسامحني والله ماعندي حد غيرك ....ابراهيم عيشك ماتخلينيش ....مانحبش نخدم قتلو بطلت ماحبش يفهم ..... -ياخي تتبهلل ....لها درجة بهيمة .....مش نبهت عليك قتلك الثنية هذي ماترجعش .....لوحت كلامي ....عماك الطمع وعملت الي في مخك ......وتوا جايتني .....امل انا نفضت يدي منك اتحمل مسؤوليتك وحدك ....مانيش لعبة بين يديك كنت واضح معاك من لول ....كنت راجل معاك وماطلبت منك شي غير تصوني وتسمع كلامي .... بعدها عليه مايحبش يضعف ......وهيا قريبة منو مايعرفش يفكر ولا ياخو موقف منها .... -امل تحمل مسؤوليتك .....ااي بيناتنا وفى قدمت قضية في الطلاق ....يعني ماعادش تخصني ولا عندي عليك حق .....هبالك الكل عديتهولك الا العملة هذي مستحيل نسامحك عليها -ابراهيم تكذب انت تحبني .....مستحيل تسلم فيا ..... -هذا الي قانعة روحك بيه .....مشى في بالك نحبك توصل تطيحلي قدري وتكسرلي كلمتي تخون ثيقتي امل وطحني ....هذا اش فهمت من حبي ليك ..... -ابراهيم ....جات باش تقربلو وقفها بيدو -امل الي عندي قولتهولك .....خترت حياتك تحمل مسؤوليتك حست بالدم طلعلها كل شي تقبلو الا ابراهيم يرفضها بدات تصيح وتعيط تبكي وتضرب فيه -مش على كيفك ....مش على كيفك تحبني وطلقني بالساهل انا امل ابراهيم ......انا صغرونتك ودلولتك .....انا مرتك بالسيف عليك .....انا الوريد الي تتنفس بيه ......انا روحك ....وماتنجمش تعيش من غيري .....وهذا مش كلامي ....كلامك انت ابراهيم ........انا ليك ....وبالقوة عاودت عنقتو تجبد فيه من مريولو قريب يتقطع في يدها -اضربني ابراهيم والله نستاهل .....ميسالش اعمل فيا الي تحب الا انك تخليني .......ابراهيم ماتنساش وعدك لبابا ولعيشة .....انا كان نخرج من الباب هذا نضيع .....عاقبني كيما تحب الا انك تبعدني عليك ..... خليها في حضنو تبكي لا نجم يمسها ولا نجم يبعدها حاس مخو باش يتحرق يحبها وموجوع منها ماعادش عندو ثيقة فيها .....تذكر وعدو لبوها تذكر عيشة وهيا توصي فيه عليها خايف لا يبعدها تزيد تغرق وتحطم حياتها يعرف الي ماعندها حد غيرو .....يعرف الي قلبو مايسلمش فيها ....دموعها غالين عندو ....لازم ياقف معاها ومايخليهاش وحدها يعرفها بهيمة ودخلها بعضها عفست على كرامتو وقرر يخليها بشروطو ... الحلقة الرابعة عشر غسلت وجها هدات شوية وقعدت مقابلتو تخزر لاجنابها تفكرت الي مرات حد في الدار -ويني طاطا وسناء....و ... -ستدعاهم خطيب سناء مشاو يشوفو في الدار و البلاد يروحو غدوا -يعني انت وحدك في الدار -لا ......هاك انت معايا .... حست بحلقها جف وجها حمار وتربثت -اخر همي نقربلك .....ماتخافش ....ماعادش تعنيلي ولا تاثر فيا شدت بكيتها بالسيف تنهد بقوة ندم على كلامو اما يلزمو يعمل حدود لعلاقتهم -امل ااي عملتو مانسامحكش عليه الي بيناتنا بالحق وفى مستحيل نعاود نعطيك جنبي ولا ناثق فيك ....باش نعاونك على خاتر ماعندك حد ....وعلى خاترك امانة عندي وعلى خاترني راجل وعندي كلمة مانخلفش وعدي مع بوك وعيشة باش تقعد معايا في الدار حتى نحل مشكلتك على اساس مرتي قدام دارنا والناس حد ما في بالو بموضوع طلاقنا كان انا وانت ومانحب حد يعرف كان في الوقت المناسب .....باش تقعد في الدار هذي بشروطي .....الجامعة تنساها .....الدخول والخروج كان بعلمي ....واكيد كلامي مانعاودوش مرتين .... هزت راسها معناها موافقة -وحاجة اخرى اتجنب قد ماتقدر العرك مع دارنا مانيش ناقص وجيعة راس ماجاوبتوش صاح فجعها -تفاهمنا امل عاودت رجعت براسها قام وخليها .... قامت وراه مفجوعة -وين ماشي -لجهنم الحمرا خليها واقفة ومشى قعدت تدور في الدار مش عارفة شتعمل جاعت ومالقات ماتاكل طيبت عجة وغطست فيها روح لقاها تاكل -وعندك قلب للماكلة زادا....صحة ليك والله ماتت بالحشمة .....تمنات لحضتها تختفي من قدامو كملت نضفت الكوجينة ومشاتلو لقاتو متكي يتفرج في التلفزة قعدت بعيد عليه وساكتة تخزرلو بحب توحشتو على الاخر نادمة على بهامتها كانت باش تفقدو وتحرم روحها حياتها الكل منو توا عرفت قيمتو كان كي بعد عليها .....هو السبب هو الي حللها العين ودللها هو الي مستحيل يقوللها لا طلباتها الكل اوامر ....في بالها المرة هذي باش تقنعو وناسية الي كل شي بكيفو ومادام قال لا يعني لا .....تنهدت بحسرة سمعها وماحبش يتلفتلها ...هو زادا قلبو دم عليها صونى تليفونها محطوط على طاولة بجنبو هزو قرا الاسم وديراكت ضربو على الحيط هبط طروف قحرلها قحرة موت -والتليفون زادا من اليوم ممنوع جات باش تحل فمها قص عليها منرفز -امل اقلب وجهك توا ....برا ارقد وخليني ....تو غدوا نتفاهمو .... دخلت لبيتو تبكي عنقت مخدتو وشدتها شهقة حبت تكتمها مانجمتش .....مش مصدقة الي ابراهيم ولا يعامل فيها هكا.....حاسة روحها ماتعرفوش .....ولات خايفة منو .....مرعوبة منو حاس راسو باش يطرشق يسمع فيها تبكي وشاد روحو عليها بالسيف مش متحمل يشوف دموعها ويقعد ساكت مايرضيهاش ...مش مصدق صغرونتو معاه تبعد عليه بعض الامتار راقدة في بيتو وفي فرشو ....مرتو ومش منجم يقربلها ولا يمسها ......تنهد من اعماق قلبو ......علاش يا امل .....علاش وصلتنا هكا قامت الصباح على حس في الكوجينة خرجت تتكسل شعرها مشبشب داخل بعضو وهابط على وجها شافها نارو شعلت كانت مغرية باتم معنى الكلمة لابستلو حوايجو كبار عليها تمنى يحملها ويرجعها للفرش ويعاقبها بطريقتو ....تبسم وحدو للفكرة وفيسع مافاق على روحو تكبس وقحرلها قربتلو تتسكبن وقفت على تراطش صوابعها باش تخلطلو خطفت بوسة من خدو وهربت ....حط يدو بلاصة البوسة وضحك عارف هالفرخة باش تهبلو ....يعرفها مستبدة والي تحب عليه توصلو خليها شربت قهوتها في عقلها وبعد رجعلها -حاضرة خزرتلو مفجوعة -لوين -اكيد مش للمحكمة مازال بكري على جلسة الطلاق قلبها وجعها ووجها تقلب -باش نهزك تجيب دبشك من الفوايا وبعد نتعدا لسي الطحان نشوف معاه حل ماحبتش تناقشو قامت فيسع لبست حوايجها ومشات معاه لمت دبشها من الفوايا وبعد تعداو للشركة قالها ستناني في الكرهبة هو هبط وقلبها هبط معاه خايفة عليه مش عارفة اش باش يصير قعدت تسب في روحها وتعاود تعدا الوقت وهيا تدعي تتعدا المقابلة على خير تتفض هالحكاية وترتاح ولاتلها كابوس تعدات ربع ساعة واخيرا تحل باب الكرهبة وطلع اول ماشفتو شهقت وجهو مضروب تحت حاجبو حلة مدت يدها باش تمسو نطرها على قوتو وجعها ....خافت اما ماسلمتش رجعتلو تسال فيه -شصار ابراهيم .....شكون ضربك ....خليني نشوفك امان شوف الدم كيفاش ....<br> قحرلها قحرة متاع موت منعها تقربلو ولا تمسو جبد كلينكس يمسح في الجرح.... -الطحان لو مافاكوهش من يدي اليوم كان باش يكونلو اخر نهار في عمرو .....يحرزلو الكلاب المحمي بيهم ضرب على الفولون مغلغل خافت تكلمو يدور عليها فهمت الي سيكيرتا هوما الي ضربوه طبيعي يعملو فيه اكثر من هكا هاد على عارفهم يفشخ فيه باش يقعدو ساكتين ثنيه كاملة يرحي دخلاني السيقارو وراء خوه تكمشت في الكرسي ولبدت حتى لوصلو وقف الكرهبة وتلفتلها ...... -الي صار اليوم مانحب حد يسمع بيه .....المشكلة وتحلت اخر مرة نحبك تجبدها حبت تسالو كيفاش ....شنيه عمل باش قنع مجيد باش مايشكيش بيها وخافت دخلو للدار هو قدامها وهيا وراه عرضتلو امو مفجوعة الحلقة الخامسة عشر سلم عليها وقالها تضربت في القاراج وبدل فيسع الموضوع تلفت لامل الي متخبيه وراه باش تسلم مشات لحماتها حاشمة ومش عارفة منين هبطت عليها هالحشمة -امي امل باش تسكن معانا لا تسالني لا علاش لا كيفاش مرتي قدام ربي وعبادو وانا حر فيها خليها مافاهمة شي ودخل يبدل في دبشو خزرت لامل مستغربة تحب تفهم منها جاوبتها في كلمتين -خاطيني هو حب هكا ..... هربت فيسع قبل ماتزيد تسالها نضمت دبشها في بيتو حتلتها عملت دوش لبست وخرجت تفركس عليه مالقاتوش شدتها سناء بالاسئلة تحب تفهم كل شي امل لاعطاتها صرف من عدل سبورة كحلة روح في الليل ما اخر لقاها مازالت ساهرة تستنى فيه -ابراهيم شبيك لتوا -وانت شدخلك تكونش مصدقة الي انتي مرتي بالحق وباش تحاسبني قربتلو خايفة تثبت في الجرح -ابراهيم راك قاعد توجع فيا -لا والله ......ماكارنيش هز حوايجو وخارج -وين ماشي -بالك ماشي في بالك باش نرقد معاك ......ماشي نتكب في الصالة ايامات تعداو وعلاقتهم متوترة نهار الكل وهو يسطكلها تفرح كان كي تبدا مع دارهم وقتها يكلمها بسياسة باش مايضهرلهم شي ..... امل قعدت تبلع وتغص منو ومن تصرفات امو واختو معاها مش متفاهمين وعمرهم ما باش يتفاهمو شبعت نبز منهم مرات تسكت ومرات ترجع عليهم حتى نهار فدت وطرشقت تعاركو عركة كبيرة وكالعادة امل ضربت سناء روح ابراهيم حكاتلو امو الي صار دخل لامل هايج فجعها شدها من زندها يرج فيها -شنبهت عليك .....ماقتلكش مانحبش مشاكل معاهم .....وين ماشية بصحة راسك -والله ستفزتني ....سبتني .....هيا الي لزتني -هذا الكل مايهمنيش نبهت عليك مادورش بيها وامي تحترمها بالسيف عليك ......خط احمر ..... جات باش تتكلم قص عليها -والله يا امل مازلت نسمع بيك تقبحت في امي فمك نهدهولك ....وتعرفني نعملها ولا لا ...... خليها تغفس في دموعها وخرج قعدت ليلة و نهار ماخرجتش من البيت تبكي غاضتها روحها والذل الي عايشة فيه حتى ابراهيم الي كان ديما في صفها ويدافع عليها ضالمة ولا مضلومة ولا توا ضدها ويهدد فيها ابراهيم تحير عليها مشى باش يشوفها ماحبتش تحلو الباب هبل وولا يعيط باش تحل صححت راسها كالعادة وماحبتش خلع الباب ودخللها حست قلبها تخلع مع الباب وقفت خايفة ترعش هو قربلها وهيا من الفجعة داخت فيسع ماخطفها قبل ماطيح حطها على الفرش وعيط لسناء تجيبلها كاس ماء وسكر شربهولها بالسيف بدات ترجع فيها الروح حلت عينها لقاتو قدامها وجهو مخطوف ضاهر مفجوع عليها ..... بجنبو واقفة سناء وامو طرشقت طول بالبكاء دورت وجها عليهم تخبي فيه ابراهيم قالهم اخرجو .....خرجو ماغير ما ناقشوه قعد ساكت بجنبها مش عارف شيعمل معاها -امل شمعناها الي عملتو اليوم ..... ماجاوبتوش -امل اخزرلي وكلمني تلفتتلو تبكي -نحب نموت .....نحب نخلط على بابا وعيشة .....هوما الي يحنو عليا ....اصلا مايحبني حد غيرهم ..... عينيه دمعت كلامها وجعو ماغير مايشعر شدها من رقبتها وجبدها لحضنو غطست راسها وسط صدرو وزادت هبلت بالبكاء -اخر مرة نسمعك تحكي هكا ....فهمت -كلكم تكرهوني .....جبتني لداركم باش تذلني...تعرف الي ماعندي وين نمشي وماعندي حد غيرك ......كان ناوي تعذبني اكثر من هكا خليني نمشي على روحي من توا شنية الفرق توا ولا بعد ماطلقني -امل تفاهمنا......حكينا فيه الموضوع قبل .....ماعادش نحبك تعاود تجبدو ......ااي صار اليوم ماعادش نحبو يصير ....سناء تو نبه عليها ماعادش تدور بيك وانت تجنبها قد ماتقدر ......واضح ..... هبطت راسها مقهورة حب ينسيها الي صار ويرضيها ماغير مايخليها تحس -ماكش جيعانة قتلو لا براسها -علي انا اكولة ملا انا الي دخت بكري....اخزرلي في عيني وقولي مانيش جيعانة .... ضحكت ماغير ماتشعر -هايا معايا لا تموت ونوحل فيك مدلها يدها باش تاقف -مانحبش نتعشى معاهم -وشكون قالك باش تاكل معاهم .....باش نهزك تاكل البرا قامت تجري باش تلبس تبسم على جنب .....مهبولة بلاني بيها ربي خرج وخليها تبدل لبست فيسع سروال نوار بونتا شوفي وشوميز روز دخلتها في السروال وصندال طالون عملت مكياج اطيرون وخرجت لقاتو يتكيف يستنى فيها هزها وحطها قربلها منرفز -من وقتاش وليت تدهن وجهك هكا ....وشنية هاللبسة الي لابستها رجعت تجري للبيت توقع تقولو بطلت الخرجة وباش تبكي كالعادة شوية ورجعت وجها مغسول بالماء والصابون خرجت الشوميز من السروال خلاتها هابطة ساترتها فرح كي شافها سمعت كلامو ماغير ماناقشاتو كالعادة هزها كلات بيتزا كانت جيعانة لدرجة نسات غشها منو يخزرلها كيفاش تاكل ويتبسم وحدو -على اساس شبعانة وماعينكش جاوبتو وفمها مليان -تحبو تقتلوني بالغزول والجوع ....ياسر عليا وضحكو الزوز روحت فرحانة بدات تحس بابراهيم متع قبل قاعد يرجعلها بالشوي بدلت حوايجها وشدت الفرش تتفكر في وجه ابراهيم وقت الي داخت.....متاكدة الي هو مازال يحبها غير يكابر وكرامتو غلبتو انو يسامحها قررت هيا الي تبادر وتتقرب منو لازم ترجعو ليها من جديد الحلقة السادسة عشر تقلبت في فرشها طار عليها نوم مخها فيه الوقت كان ماخر ودارهم رقدو قالت باز راو مازال ساهر يتفرج مشاتلو .... دوب ماشافها فرح محتاج يقعد معاها اكثر ويشبع منها ....حسب روحو مستغرب جيتها -لباس امل شبيك ..... -طار عليا النوم قولت نجي نتفرج معاك في فيلم قعدت بعيد عليه وحسبت روحها تتفرج وهيا تاكل فيه بعينيها متكي على البنك لابس مريول نص وسروال سبور محلاه طالعين عليه تمنات يعيطلها و يحطها عندو حست بسخانة بقربو قعدت تحارب في بدنها باش مايضعفش وتمشيلو .....وين يتلفت يطيحها تخزرلو فايق بيها ومطفي الضوء ...حبت تجبد معاه موضوع مع انها تعرفو باش ينرفزو اما من حقها تعرف - ابراهيم شعملت مع مجيد ....كيفاش قنعتو باش ينسى الحكاية ومايشكيش بيا قحرلها على جنب -ماتستاهلش برشا ذكاء صحيح ميكانسيان اما مانيش مسطك كي برشا ناس ..يرمي في الكلام عليها وجها حمار وسكتت -ماتعرفش الي ممنوع عليه يخدمك بدون اذن مني خاترك معرسة .....راك عايشة في تونس ودومان الخدمة هذي يطلب موافقتي وهو غشك يعني ااكونترا متاعو باطل وزيد كان يشكي يباصي هو مش انت يا مسطكة خاترو مزور عقد -باهي كي هيا الحكاية هكا وكنت متاكد الي ماعندو وين يوصل في تهديدو علاش تضرب فيه -على مدان يدو عليك حبيت نكسرهالو حبيت ندقدقلو عضامو لمجرد انو فكر فيك حست قلبها يرعش من اجابتو -يعني ضربتو وانت كنت متاكد الي وحدك والسكيريتا مش باش يسكتو وعملتها -خاتر يستاهل .....في الوقت هذاكا مافكرت في حد غير ناخولك حقك... خاترو حب يتعدا عليك -وعلاش عملت هذا الكل ابراهيم على خاتري -على خاترك امانة عندي -اكاهو .... -وعلى خاترني راجل مانحب حد يتعدا على شرفي -اكاهو .... -وعلى خاتر..... -شنية -على خاترك مسطكة ولازم حد يدافع عليك قامت منرفزة جات خارجة شدها من يدها جبدها بقوة طاحت عليه جاء وجها قريب لوجهو شمت ريحة النفس متاعو ذابت صدرها في صدرو كابس على يدها واليد الاخرى حوطها بيها.....قعدو يخزرو لبعضهم برشا كلام في عينيهم برشا لوم بشا حب وبرشا وحش قربلها لفمها وهمسلها ......-وعلى خاترني نحبك ومانحب حد يضرك ..... بلعت ريقها بالسيف حست بالسخانة طلعتلها قعد يتبع فيها بعينيه حطت يدها على الجرح الي تحت حاجبو تعدي في صوابعها عليه باستو منو بوسات حنان ....بدنو تكهرب وتصلب متمتع بقربها ودحنيسها عليه خليها تتمادى حب يشوفها وين باش توصل حطت يدها على صدرو تتحسس فيه هبطتها لكرشو حس بيدها دافية وحنينة.......ماعادش فيه متوحشها ومتمنيها كبس عليها ودورها تحتو جات باش تهرب شدها -امل مش هذا الي تحب توصلو .... طبس باش يبوسها قعدت تبعد في راسها ماخلاتوش زاد كبس عليها اكثر تحتو باش تركح .....هبط لرقبتها وصدرها يبوس فيها بلهفة حست بالخطر وخافت -ابراهيم امانك مش هكا ..... ماسمعهاش شهوتو عماتو ولات تبكي وتحاول فيه -عيشك ابراهيم سيبني . ....امانك حبيبي مش هكا ... .مش هذا الي نحب عليه ..... وقف وخزرلها عينيه ذابلة كلها رغبة -مش مرتي ....وربي محللك ليا.....نحب ناخو حقي دموعها هبطو حارين -مانحبش نكونلك شهوة ......تملكني الليلة وبعد تلوحني .....ناسي الي انت باش طلقني ......مافكرتش فيا من بعد قام من فوقها فادد قعد على البنك يتكيف -امل قوم برا ارقد الحلقة السابعة عشر تعدات الايامات تجري وابراهيم وامل في مد وجزر مرات يكون سيس وحنين معاها ومرات يسطكلها كيما يحب وين يتفكر الي هيا كذبت عليه وخيرت الفلوس والخدمة عليه ينقم عليها رجعت المشاكل والعرك بينها وبين سناء كالشرارة والنار يتعاركو على اتفه حاجة وبطبيعة امل ماتسكتش على حقها ....فدت وكرهت روحها كل يوم نفس الحكاية تتعاود ابراهيم يخرج يخدم وامل تقعد وحدها في الدار حاصرة روحها في البيت لا تحب تقضي ولا تطيب تعدي وقتها نوم وتلفزة الي اكثرية مشاكلها عليها هيا وسناء روح نهار ابراهيم تاعب عرضتلو امو وسناء بالشكوى سيناريو كل يوم يتعاود مل وتعب من مشاكلهم حب يحكي مع امل ويوقف هالمهزلة -وقتاش باش تعمل عقلك وتريض -وقت الي تخرجني من هالدار .... -على اساس عندك بلاصة اخرى تمشيلها حتى الدار الي كنتو تسكنو فيها كنتو كارينها طرشقت بالبكاء - عارفين ماعندي وين نمشي ذليتوني كيما حبيتو انت مخليني معلقة لا معرسة لا مطلقة وداركم متشمتين بحالي كل يوم -كان تنحي صحت راسك وتبدل طبيعتك الواقفة تو تتفاهم مع دارنا ويحبوك اما انت الي يكلمك كلمة تشعل فيه لسانك داير برقبتك ماتقدر حد -خاترهم يكرهوني مايحبونيش مش متشرفين بيا .....مش حابيني نكون مرتك ....خذيتني بالسيف عليهم ....عمرهم مايقبلوني ......شوفلي حل ابراهيم .....قاعدة نموت بالعرق معاهم......مانيش مرتاحة كرهت حياتي ....مانيش لاقية راحتي في شي ..... -امل هذا الموجود ماعنديش حل اخر غيرو -شمعناها؟ .....معناها باش تقعد حابسني حياتي كاملة معاهم ....حاصرني بين 4 حيوط لا ندخل لا نخرج حتى تليفون كالناس ماعنديش ....علاش ناوي ابراهيم ... فاش تستنى باش طلقني ....علاش تعذب فيا .....توا شهرين وانا معاك معلقة مش فاهمة روحي ...قاعدة معاك بصيفتي شنية ....فديت ابراهيم .....طلقني ارتاح وريحني -تنجم تقولي بعد مانطلقك وين باش تمشي -حاجة ماتخصكش الشارع ارحم الف مرة من معاملتكم ليا ....نبيع روحي ومانتحملش ذلكم صرفقها بكف شدها من شعرها كلامها ستفزو -مانستغربش منك تعملها على الفلوس تبيع روحك مش جديدة عليك ولات تبكي تسلك في روحها منو وهو يتهدد باش يضربها جات امو تجري فكتها من يدو ماخلاتوش يمسها -تحب طلق مالا امل ......باهي يا للا حضر روحك بعد عرس سناء نفذلك الي تحب عليه حاسة روحها وحيدة حزينة ماعادش عندها رغبة باش تعيش اكتآبت الحاجة الوحيدة الي كانت مفرحتها ومواسيتها قبل وجود ابراهيم في حياتها توا معاها وفاقدتو كرها وبعد عليهاحاسة روحها قاعدة تموت سلة سلة من غيرو مش متحملة معاملتو ليها مش قابلة انو يرفضها ولا يبطل يحبها ......ماعادش عندها حتى جهد للعرك ولات تسمع وتفلت ماعادش ترجع على حد ماعاد يهمها شي ابراهيم وخسرتو شبقالها اخر باش تحارب عليه الدنيا حرمتها من كل شي تحبو قاعدة تستنى في المستقبل اش مخبيلها ..... فقدت الاحساس بالامان مخنوقة وماحاس بيها حد عايشة وسط عايلة ماتعنيلهم شي .....حاسدتهم على لمتهم وحبهم لبعضهم حاسدة سناء على دلالها ووجود امها وبوها في حياتها ....حاسدتها على ابراهيم ووقفتو معاها هو وخوه ....حاسدتها على فرحتها بعرسها وتحضيراتو ....كل ماتشري قطعة زهاز ولا تعربن على حاجة امل تحس بغصة في قلبها تبكي دخلاني ....تتفكر امها وبوها ......تتفكر عيشة كان حلمها تشوفها عروسة كانت تتمنى تعرسلها بالي تقدر تخرجها من دارها رافعة راسها .....مشات عيشة....ماتت وماتت معاها احلامها ....... تكونتلها عقدة على هذاكا تكره سناء من قبل خاتر عندها كل شي الي تحرمتو منو هيا سناء متمتعة بيه دفأ العايلة اهتمامهم ومحبتهم .....كانت تغار منها حتى على ابراهيم .....تحبو ليها وحدها مايشاركها حد فيه حتى امو.....هو الوحيد الي يعوض النقص الي حاسة بيه ..... ابراهيم كان فاهم هذا الكل وحاسس بيها اصلا قريها قراية يعرف الي هيا تصطنع في القوة باش تخبي ضعفها يعرف الي هيا تحبو وتموت عليه والي هو عالمها الكل كان فاهم وعاذرها تربات محرومة من حضن امها وكملت تحرمت من بوها تربات في الفقر لو ماجاش هو في حياتها عونها راي حتى قرايتها مانجمتش تكملها .....ابراهيم بالنسبة ليها قبل مايكون راجلها هو البو والخو والدرع الي تحتمي بيه على هذاكا كي بعد عليها مرضت وماتحملتش خسارتو كرهت الدنيا الي باش تحرمها منو الحلقة الثامنة عشر عرس سناء قرب وهيا معاهم تدور بدن بلا روح تستنى في مصيرها الي بين يدين ابراهيم حتى يقررو تلمت العايلة الكل جاء خوه ومرتو حبلة ضياف ..... حماتها وين نحطك يا طبق الورد فرحانة بيها تسايس وتدلل فيها وامل الغيرة تاكل فيها غايضتها روحها محقورة سهرية كاملة قاعدة معاهم حزينة هوما يفدلكو ويضحكو وهيا في عالم اخر تخزر لكرش مريم مرت خوه وتتخيل في روحها حبلة من ابراهيم ماغير ماتشعر حطت يدها على كرشها وسرحت .... ابراهيم يراقب في تحركاتها وشافها شعملت تبسم وحدو ليلتها بعد مارقدو الكل قعدت تتفرج مع ابراهيم في التلفزة خذاتها عينها ورقدت قامت مع الفجر لقات روحها مغطية في نفس البلاصة وابراهيم راقد فوق البنك مقابلها مشاتلو وتحشات عندو جبدتلو يدو عنقتها واعطاتو بضهرها ورقدت مكبشة فيه قام الصباح مفجوع على صوت الباب تحل شاف بوه كان داخل شافهم كيفاش راقدين حشم ولا خرج ابراهيم وقتها فاق على روحو يحس في يدو رزينة تلفت يلقاها امل راقدة في حضنو لا فهم يفرح ولا يتغشش من الموقف الي حطتو فيه مع بوه جبد يدو بالسياسة ماحبش يفيقها قعد يتفرج فيها كيفاش راقدة .....تضحك حاطة يدها على خدها كالطفلة الصغيرة .....اول ليلة تبات صغرونتو في حضنو ...عدا يدو على شعرها وباسها من راسها خرج حاشم من بوه با اانا وجه باش يقابلو بدا عرس سناء الناس الكل فرحانة الا هيا حزينة بمجرد يوفي العرس توفى حياتها ....باش تفقد ابراهيم على طول حماتها كبشت فيها تحني وتعمل حرقوس مع سناء قال شنية على عينين الناس وكوم كوا تحب تعوضلها خاتر ماعملتش عرس وروحتلهم هكاكا هبط عليها سر قول هيا العروسة لقات روحها تساير في حماتها الي تقولها تعملو تعملو قول هيا وسناء باش يعرسو بدات تستمتع حاسة روحها بالحق عروسة اول مرة تحس حماتها تحبها وماتميزش بينها وبين سناء عاشت اللحضة وتخيلت روحها بالحق هيا العروسة .....كانت تتمنى عرس كي اندادها خذلتها الدنيا وحرمتها من فرحة عمرها .....كذبت على روحها كذبة وصدقتها حبت تحقق حلمها وحدها حتى بالوهم خاتر عارفة الي بعد عرس سناء باش تفيق على اكبر حقيقة حرمانها من ابراهيم ....جمعة العرس الكل ماشافتش فيها ابراهيم كلمتو تسال عليه قالها الدار مليانة قاعد في دار خوه الليلة عرس سناء مشات معاها للحجامة كرات روبة بلون صال سيران طويلة مزينة بالدونتال سامبل وطلعت فتوق على بدنها عملت شعرها بوكلا على طولو وحطت تاج صغير على راسها طلعت فينو ومزيانة جاء خوه خرجهم من الحجامة وهزهم ديراكت للصالة ملي وصلت قعدت تفركس عليه بعينيها توحشتو عندها اكثر من الجمعة ماشافتوش تحبو يشوفها وهيا مزينة على خاترو....تعدا الوقت وهو مابانش خذات تليفون مريم وخرجت باش تكلمو البرا هيا على اعصابها تطلب فيه وتسمع في صوت فجعها -تلوج على حد تلفتت طول تلقاه قدامها لابس سروال وشوميز نوار زايدين فيه الشطر حلقة التاسعة عشر كان ضوء الشارع ساطع فيهم عينيهم الزوز يلمعو محبة ووحش بدا يقربلها وقف قدامها بالضبط يثبت فيها نضراتو رهوجوها ودخلوها بعضها .....بلعت لسانها وماعرفتش تجاوبو ضاع الكلام وضاعت هيا في حضورو شدها من يدها ودخلها معاه بالصدفة حطو غناية رومنسية هبطت سناء وراجلها وكوبلوات اخرين جات باش تقعد جبدها للبيست حط يدو على نصها ولزها ليه طاوعتو زادت قربتلو اكثر طوقت رقبتو بيديها الزوز كاينها تخبي فيه من عينين الناس تحبو ليها وحدها مايخزرلو حد غيرها ....حبت تعيش ليلتها بادق تفاصيلها كاينها هيا الاميرة الي تستنى في نص الليل باش توفى حلمتها وتقعدلها كان الذكرى حطت وجها في رقبتو تملا في رواريها من ريحتو ممكن هذي اخر مرة تكون قريبتلو فيها وتتمتع باحساس بدنو وفات الغناية وهيا مازلت مكبشة في حضنو ما حبتش تبعد خايفة لا تسيبو يضيع عليها ....خايفة لا تفقدو ... عيطلو خوه ضطر يسيبها ومشالو رجعت لبلاصتها وهيا مازلت تحس بسخانتو...بلمسة يدو على بدنها ..... وفات السهرية جات باش تسلم على سناء وراجلها قبل مايروحو عنقو بعضهم وطرشقو الزوز بالبكاء اول مرة يحسو ببعضهم .... -باش نتوحشك ونتوحش العرك معاك ..... -رتحت مني ومن مشاكلي -ربي يهنيك ....وسامحني علي عملتو فيك -انت لازمك تسامحني غلط في حقك ياسر -حتى كان جينا خوات كنا باش نتعاركو زادا تبسمتلها امل وباستها .....عاودت عنقتها سناء تبكي ودعتها بمحبة و قلوب صافية ركبت مع راجلها ومشات قعدت امل تغفس في دموعها طلعت بجنب ابراهيم باش يروحو يخزرلها دموعها كالشتاء ضحك وحب يخرجها ملي هيا فيه -على اساس كنتو تتفاهمو وتحبو بعضكم الي شافكم بكري يقولو بالحق كانو يموتو على بعضهم جاوبتو وهيا تشهق -حتى هيا مشات وخلاتني .....كانت ماليتلي حياتي حتى بالعرك -تي خير حتى انتوما شيبتولي راسي وزيد على اساس انت باش تقعد فيها الدار هذيكا بعدها هزت راسها تخزرلو حست روحها خرجت منها تخنقت بالبكاء والقهرة - مزروب تحب تتخلص مني..... -والله انت الي حبيت وانا لبيتلك الي طلبتو ماغير مافكرت حلت باب الكرهبة وهيا تجري حبت ترمي روحها تموت وترتاح ولا تعيش بلا بيه جبدها اخر لحضة و شد فران قوي وقف الكرهبة وتلفتلها مفجوع اعطاتو فجعة باهية -شبيك هبلت باش تلوح روحك من الكرهبة تحب تموت .... طرشقت عليه تبكي وتسب فيه -ايه نحب نموت ....نحب نموت ونرتاح نحب نخلط على بابا وامي .....نحب نشوف عيشة توحشتها ....نحب نرتاح منك .....نحب ننساك .....نموت ولا تخرجني من حياتك ....الموت ارحم من اني نخسرك ...نحب نموت على خاتر ماعاد عندي حد باش نعيش على خاترو -مازلت صغيرة والدنيا قدامك ...ماهيش باش تاقف عليا .....مازلت باش تحب وتتحب ....تو يجيك راجل ماخير مني يحققلك احلامك....ويعيشك كيما تحب يكلم فيها وشاد الضحكة بالسيف خاصة كي شافها تنرفزت ووجها حمار هبطت من الكرهبة تجري خلط عليها يعرفها مهبولة عندها قد قد تحط روحها تحت كرهبة خطفها فيسع وحصرها عندو قعدت تبكي تبعد فيه تضرب فيه على صدرو وتسب -وانا مانحب حتى راجل غيرك يا بهيم .....وقتاش باش تفهم يا مسطك الي انا من غيرك نموت ....كان تخليني نضيع ....نقتلك يا براهيم ونقتل روحي كان توصل طلقني تبسم على هبالها بدل صوتو عامل فيها جدي ومنرفز -بالقوة هو تحب تملكني -شدتو من كول الشوميز تجبد فيه ضطر يهبط راسو باش يقرب لوجها عينيها معبيه دموع حطتهم في عينيه تتحدا فيه -مش بكيفك تسلم فيا .....انا متاعك ....انا مرتك وليك كان انت .... حط خشمو على خشمها وتبسم -اه منك يا مستبدة .....طول عمرك غالبتني ....كل شي تاخذو مني بالقوة -الا قلبك .....اعطيتهولي برضاك -ومازالت حاجة اخرى باش نعطيهالك بكيفي .... حشمت ووجها حمار دخلت بعضها وجات هاربة منو شدلها يدها وضحك -نعرف مخك الصغير خامج ههههه جبد من جيبو باكو حلو قدامها طلع فيه خاتم -خطبت وعرست بيك ونسيت مالبستكش خاتم نقزت طول في رقبتو تبوس فيه وتعاود -يعني ......يعني ..... -يعني نحبك يا مستبدة ....ومستحيل نسلم فيك جيست كانلك درس صغير باش تعرف قيمتي ومعادش تفكر تتجاوز حدودك معايا يعني قرصة صغيرة للمستقبل ضحكت وضربتو على صدرو - عذبتني المدة هذي الكل وفي الاخر تقولي قرصة صغيرة ....يا ضالم -مازال الضلم على اصولو باش تشوفو مني -شتقصد تبسم بخبث -هيا تو تعرف طلعت معاه فرحانة ومش عارفة فاش يخطط وقف قدام دار صغرونة وهبطها -وين جايبني حل الباب وحملها ماغير ماجاوبها وهيا تفارع فيه تحب تهبط دخلو وسكر الباب قعدت تدور في عينيها في الدار مستغربة قبل ماتعاود تسالو جاوبها -مملكتك الصغيرة ... ..سامحني حبيبي مانجمتش نعملك عرس الي وعدتك بيه اما حضرتلك دارك الي حلمت بيها تنطرت تجري لصدرو وتخبات عندو ....نحبك يا روحي الله لا ينحيك عليا ....بعد الي عملتو معايا مازلت نفكر في عرس ....الي يهمني انت حتى في الصحراء نعيش معاك ضحك ....وعقد حواجبو الحلقة العشرون -عيني في عينك تراه ههههه .....وينو خرجني منها هالدار ....وشوفلي حل ...ووووو -قبل هذاكا ....المدة الاخرى تبدلو معايا حتى امك ولات تحبني شوف ....وراتو يدها بالحنة والحرقوس ....حبت تفرحني كيما سناء وخرجتني عروسة حتى انا .... باسها في كف يدها .... -امي نفذت الي وصيتها عليه ....حبيت نفرحك ونعوضك حتى شوية ....... -نحبك ابراهيم ......نحبك والله ....ولاتطلب مني عينايا نعطيهالك.... -مانحبش عينيك نحبهم ديما يخزرولي كان انا.... اما نحب منك حاجة اخرى ....سنين وانا نستنى فيها .... -حملني ..... مافهماش -قتلك حملني .....وهزني للبيت نوم مات بالضحك -اعمل فيها حاشمة زعما زعما وقول لا ....تعبني على الاقل شوية ههه -مازلت باش نتعبك اما مش ليلة .....الليلة متاعك ....وملكك ......هزني ابراهيم ودخلني لعالمك ..... النهاية person_outline Unknown all love
